KORONADAL CITY – Dako ang kalain sang buot sang pamilya Diamalol sa pagtratar sa ila himata nga napatay bangud sa ginsuspetsaran suno pa sang balatian nga covid-19 apesar nga lain ang ginasuprer nga balatian.
Suno kay alyas Mary Anne, gindangat nila sa isa ka pribado nga ospital ang biktima nga si Gemberly Diamalol, 23 anyos kag manunudlo sang Engkong Elementary School bangud nagasuprer ini sang hilanat, nagapalanuka kag may pulmonya kag ulcer.
Apang ila ginkatingala nga sang nagtaliwan ini, nagguwa nga suspetsado suno pa ini sa covid-19.
Ginduso ni Mary Anne nga wala sang travel history si Gemberly kag yara lamang sa bukid.
Suno sa reklamante, ginakalain man nila sang buot nga wala man lang nila nakit-an nga ilubong ang ila himata.
Nahibaloan nga nagpain sang malawig nga oras ang pasyente sa pag-asikaso sa mga modules bangud igadul-ong niya ini sa buluthoan nga posible nagtuga sang paglala sang iya ginabatyag.
Samtang nagpaathag naman si City Health Officer Dr. Editho Vego nga aminado ini sa una nga findings sa nasambit nga pasyente nangin probable sa Covid-19 si Diamalol, apang sang nag-abot suno pa ang isa pa ka test didto nahibaluan nga nag positive ang manunudlo sa nasambit nga virus.
Ginpahayag sang opisyal nga mangin siya mismo ang wala siya nakahibalo kun diin nakuha sang manunudlo ang virus.
Apang posible suno pa nga may nakasulapo ini sa Brgy. Sta Cruz kag naghuyang ang iya immune system bangud sa paghikutar sa mga modules.
Sa ulihi nagpalab-ot ini sang pagpangasubo sa pamilya kag himata ilabi na nga tuman ka-lamharon nga manunudlo ang nagtaliwan.
