KORONADAL CITY– Nagasakot ang emosyon nga nabatyagan sa subong sang mga nabilin nga pamilya sang mga biktima sang Maguindanao massacre angot sa nagahilapit nga pagpaguwa sang Department of Justice sa desisyon sang kaso batuk sa mga akusado.
Sa ekslusibo nga interbyu sang Bombo Radyo Koronadal kay Emily Lopez, presidente sang Justice Now Movement, lubos nila nga ginakalipay ang nasambit nga balita bangud matapos ang 10 ka tuig tigayon na nga magapaguwa ang korte sang desisyon kag ginalauman nila nga mapanabat ang mga akusado sa makangilidlis nga krimen.
Apang, nabalaka man sila sa mangin resulta sang promulgation sang kaso.
Ini bangud sa posible nga pagbalik sa posisyon sa gobyerno sang pila ka mga ginatudlo nga yara sa likod sang nasambit nga masaker.
Sa subong nagapdayon ang pagpatigayon nila sang consultation meeting kada bulan kag pagsinapol sa tagsa ka pamilya sang mga biktima agud nga makab-ot ang ginahandum nga hustisya.
Una diri, kampante ang DOJ nga igapaguwa sang korte ang desisyon sa kaso antes ang isaka dekada nga anibersaryo sini sa palaabuton nga Nobyembre 23, 2019.
Madumduman nga sa nasambit nga masaker, 58 diri ang napatay nga ginalakipan sang masobra 30 ka katapu sang media lakip na ang anay chief of reporters sang Bombo Radyo Koronadal nga si Bombo Bart Maravilla.
