KORONADAL CITY – Nagpangayo karon sang bulig ang pamilya sang lalaki nga naglumpat sa departure area sang NAIA Terminal 1 sang tinalikdan nga huwebes sa hapos nga makapauli na sa South Cotabato ang bankay sini.
Ginkilala ang napatay nga si Michael Laureano, 27 years old kag residente sang Purok Sampaguita, Brgy.Colongulo, Surallah South Cotabato.
Sa interbyu sang Bombo Radyo Koronadal kay Riza Laureano, utod sang biktima, nagpalapit sila sa waragwagan sang Bombo Radyo agud mangayo sang bulig bangud indi sila nagapati nga naglumpat ang iya nga utod kag nagpakamatay.
Posible suno pa nga ginhadlok ini o kun nakabatyag ang iya nga utod sang pagkabalaka bangud una na ini nga nagpangayo sang bulig sa iya bangud nagakabalaka ini nga palayason sang iya nga amo.
Antes pa man nagluntad ang panghilitabo, nagchat pa ang biktima sa iya nga utod.
Sa karon ang hingyo lamang nila, ang maimbestigahan ang panghilitabo kag makauli ang patay nga lawas sang biktima sa ila nga puluy an diri sa Surallah, South Cotabato agud nga malubong ini sang insakto.
Problema naman nila sa karon ang galastuhon sa pagpa uli sang bangkay amo nga nagapanawagan sila sang bulig sa gobyerno.
