KORONADAL CITY – Nagpadulong sa Bombo Radyo Koronadal ang nagakabalaka nga pamilya sang isa ka OFW nga ginamaltrato sa Saudi Arabia.
Sa panysayon ni Ginang Lilia Catil, iloy sang OFW nga si Kimberly Catil, 24 anyos kag residente sang Prk. Balnabo, Brgy. San Roque, Koronadal City, daw indi na makapahuway ang iya bata bangud sa tuman nga obra nga ginahatag diri sang iya agalon.
Magluwas diri, indi man maayo ang kondisyon sang iya lawas ilabi na nga daw nagakadunot na ang mga kamot sini bangud sa pag-obra kag kakulangon sa tulog.
Emosyonal man nga ginpakigbahin ni Ginang Lilia nga sa ulihi nga pag-istoryahanay nila sang iya bata, ginhangyo sini nga buligan siya nga makapuli sa pungsod ukon magahikog ini kun indi ma-rescue.
Nahibaloan nga naghalin ini sa Pilipinas sadtong Agosto 30, 2018 kag ini ang una nga tion niya nga mag-obra sa iban nga pungsod.
