KORONADAL CITY – Nagapanawagan sa karon sang dull justice ang pamilya ni late Bombo Bart Maravilla, anay Chief of Reporters sang Bombo Radyo Koronadal nga lakip sa 58 brutal nga ginpatay sa Ampatuan Massacre sang Nobyembre 23, 2009 sa Sitio Masalay, Barangay Salman, Ampatuan, Maguindanao.
Sa interbyu sang Bombo Radyo Koronadal sa pamilya Maravilla, kalain lanag sa gihapon ang ila nga buot bangud permi nila madumduman ang makahingidlis nga krimen pag abot sang bulan sang Nobyembre bangud tubtub sa karon indi pa sa gihapon klaro kung maangkon bala nila ang hustisya.
Suno kay Janchiene Maravilla, ikaduha nga bata ni Bombo Bart, 14 ka tuig na sila nga naekperyensyahan ang sakit bangud sa pagkapatay sang ila nga amay kag wala lang man nakabayad pa ang may kahimuan sang krimen.
Sa karon, tatlo na sila nga nakatapos sang pageskwela kag sa pagkamatuod may apo na nga lalaki si Bombo Bart apang indi sa gihapon nila naangkon ang matuod tuod nga hustisya.
Ginpahayag man sang pamilya Maravilla nga ini nila malikawan nga mahadlok sa gihapon sa ila nga seguridad ilabi na ang pagbisita sa masscare site bangud nagapabilin sa gihapon nga mas powerful ang ila nga kalaban kag ang utak sang krimen.
Kadungan sang ika-14 nga tuig nga anibersaryo sang makahingidlis nga krimen , hinyo lamang sang pamilya Maravilla kay Pangulong Ferdinand Marcos Jr nga buligan sila nga mag-usad na ang kaso, madakpan ang mga at-large sa gihapon nga suspek kag mahatag ang kumpensasyon nga sa kadugayon wala sa gihapon nila nakuha.
