Ginpabutyag sang Malacañang nga indi lamang ini isa ka ordinaryo nga pagpanghulga ang ginatawag nga pahayag ni Vice President Sara Duterte batok kay Presidente Ferdinand Marcos Jr., First Lady Liza Araneta-Marcos, kag anay Speaker Martin Romualdez.
Suno kay Palace Press Officer Undersecretary Claire Castro, kon indi mahimo nga kabigon nga pagpanghulga ang mga pahayag sang bise presidente, kinahanglan nga klaruhon sang iya kampo kon ano gid ang matuod nga buot silingon sini.
Dugang pa ni Castro, may kaangtanan ini sa national security bangud ang ginatudlo sang mga pahayag amo ang nagalingkod nga Presidente sang Pilipinas, samtang ang naghambal amo man ang nagalingkod nga bise presidente.
Ginpahayag man niya nga kinahanglan mapamatud-an sang kampo ni Duterte ang ila mga rason nga ginpresentar bilang depensa. Lakip diri ang ila gin-angkon nga pagpanggipit sa anay chief of staff nga si Zuleika Lopez kag ang ginasiling nga pagpanginbulahan sa kabuhi sang bise presidente.
Sa pihak sang mga pahayag, wala pa sang dugang nga komento ang kampo ni Vice President Sara Duterte angut sa pinakabag-o nga pahayag sang Malacañang.
