Nagapatigayon sang mas madalom nga imbestigasyon ang mga otoridad agud matumod ang identity sang mga suspek sa likod sang pagsigabong sang bomba sa probinsiya sang Basilan.
Suno sa kapulisan, nagluntad ang pagsigabong sang bomba alas-8:56 sang gab-i, Martes, Agosto 13, malapit sa mini-gymnasium sang Poblacion, Tipo-Tipo, Basilan.
Sa ginpaguwa nga datos sang kapulisan, wala sang may napatay ukon napilsan sa insidente magluwas sa dyutay nga nga danyos sa perimeter fence sang municipal hall sang Tipo-Tipo.
Sandig sa imbestigasyon, ang nagsigabong nga bomba ang ginhaboy sang isa ka indibidwal nga nagasakay sa motorsiklo kun diin pag-agi sang mga ini sa malapit sa mini-gymnasium, gilayon nga nagsigabong.
Ginalauman naman sang mga otoridad sa Tipo-Tipo nga ang insidente ang may kahilabtanan sa pa pagpanabotahe sa preparasyon sang mga aktibidad para sa Tipun-Tipunan Festival sa madason nga semana.
Kaangot sini, ginlaygayan sang kapulisan ang mga residente sang Tipo-Tipo nga magpabilin nga kalmado apang mangin vigilante agud makalikaw sa kapahamakan.
