KORONADAL CITY – Ginakabig subong nga dako nga pagpanghangkat para sa simbahan ang natabo nga pagpasigabong sang bomba kahapon nga ginkapilas sang 2 kag ginkatrauma naman sang isa pa.
Ini ang reaksiyon ni Father Herminio Hongayo Jr. Vica 2 sang Christ the King Cathedral sa interbyu sang Bombo Radyo Koronadal.
Suno kay Father Hongayo, dako nga pagpanghangkat para sa simbahan, komunidad, kapulisan kag mga opisyal ang natabo kahapon rason nga tanan dapat nga magbulig agud nga mapabilin ang kalinong.
Dugang pa ni Father Hongayo, pangamuyo ang aton nga pangontra batuk sa malain nga plano agud nga magtuga sang kalakasan nga nagtuga man sang kahadlok sa mga pumuluyo sang siyudad.
Apang, indi man makaapekto sa mga aktibidad sa simbahan ang nasambit nga hitabo.
Wala naman daw sang kahilabtanan ang pagdesignar sang bag-o nga obispo sang Diocese of Marbel sa hitabo.
Ini makalihad nga ginkumpirar ni Bishop Dinulado Gutierrez ang pagbaton na ni Pope Francis sang iya nga resignation kag ang pag-appoint naman kay incoming Bishop Cerilo “Allan” Casicas.
Sa subong, ginpahugtan pa ang seguridad sa simbahan kun diin may isa ka entry kag exit point na lamang ini.
