KORONADAL CITY- Nagapadayon sa karon ang imbestigasyon sang mga otoridad sa nagluntad nga pagsigabong sang granada sa siyudad sang Cotabato nga nagresulta sa pagkapilas sang pito (7) ka mga indibidwal.
Ini ang ginpahayag ni Police Captain Kenneth Rosales, Cotabato City Police Station 1 Commander sa interview sang Bombo Radyo Koronadal.
Ginkilala ang 5 sa pito ka mga biktima nga sanday Parson Matingkong Guiaplos, Omar Jiamalodin, Sittie Amerkan, Norhanifa Uy kag Mary Joy Antolan nga lunsay residente sang nasambit nga lugar kag nag-angkon sang pilas sa nagkalain-lain nga bahin sang ila nga lawas.
Suno pa kay Captain Rosales, nagluntad ang pagsigabong sa sulod mismo sang isa ka bar sa Barangay Rosary Heights 2 pasado alas-9:00 kagab-i.
Dugang pa sang opisyal, posible nga customer ang target sang pagsigabong apang wala man ginadula sa karon ang iban pa nga anggulo ukon motibo sa hitabo.
Sa subong ginahibalo pa sang kapulisan ang identity sang mga suspek.
Nagalaum naman ang kapulisan nga maresolbar sang mas temprano ang kaso matapos nga makuhaan man sang CCTV footage ang hitabo.
Nagapaayo naman karon sa hospital ang mga biktima samtang ang mga may minor injury ang nakaguwa na sa ila tagsa ka puluy-an.
