KORONADAL CITY- Madamo nga mga Romano Katoliko ang nagpadulong sa simbahan subong nga adlaw agud magsimba kag magpabutang sang abo kadungan sang Ash Wednesday.
Sa interview sang Bombo Radyo Koronadal kay Fr. Roming Catedral , Parish Vicar 1, ang Ash Wednesday ang tanda sang pagsugod na sang Kuwaresma.
Suno sa kay Fr. Catedra, ginahatagan sang importansiya sa sini nga tion ang pagsakripisyo ni Hesus Kristo. Ang abo nga ginabutang sa agtang ang nagasimbolo nga kita tanan ang halin sa abo kag maga balik sa abo.
Kadungan sini, nagpaguwa man sang mga pagsulundan ang Catholic Bishops Conference of the Philippines ( CBCP) sa pagpadulong sang mga sumilimba sa simbahan.
Nagpanawagan man ini sa tanan nga mga Romano Katoliko nga magpuasa kag mamalandong indi lamang subong nga adlaw kundi sa bug-os nga kasaulugan sang lent.
Ang mga schedule sang misa para sa Ash Wednesday sa Christ the King Cathedral para sa subong nga adlaw amo ang mga masunod: 5:30 sa aga, alas 12:00 sa udto , 5:15 sa hapon kag ang ulihi nga ilonggo mass ang igapatigayon sa alas 7:00 sang gab-i.
Gina -engganyo man ang tanan nga mag-tambong sa misa nga magsunod sa Mandatory Health Protocols.
