Nagapabilin nga palas-anon ang padayon nga pagtaas sang presyo sang gasolina sa mga tricycle drivers sa syudad sang Koronadal, ilabi na sa mga drivers nga naga-arkila lamang sang ila tricycle kag nagadepende sa ila adlaw-adlaw nga kita. Sa interview sang Bombo Radyo Koronadal ginpahayag ni Rhodz Camilo, isa ka tricycle driver kag residente sang syudad, nga dako ang epekto sang mahal nga gatong sa ila palangabuhian.
Suno kay Camilo, ng wala pa sang opisyal nga saka sa pletehan sa downtown area, gani kinahanglan nila nga mangita sang paagi agud sustenaran ang nagtaas nga adlaw-adlaw nga galastuhan. Dugang ni Camilo, nga may mga pasahero nga boluntaryo nga nagadugang sang P5 sa regular nga P15 nga pamasahe. Gindugang ni Camilo, nga may mga tawo man gihapon nga nagabayad sang regular nga pamasahe, kag wala nila ginapilit nga magtaas ang mga pasahero apesar wala pa sang official fare increase.
Magluwas sa gatong, nagtaas man ang presyo sang bugas kag iban pa nga kinahanglanon sa panimalay. Bangud sini, napilitan ang pamilya ni Camilo nga mangin makinot sa paggasto kag ipa-iway ang pagbakal sang pila ka mga non-essential items agud nga masabat ang ila limitado nga kita.
