KORONADAL CITY – Ginkabalak-an sang pamunuan sang Integrated Provincial Health Office (IPHO) sang South Cotabato ang pagsaka sang kaso sang coronavirus disease 2019 (Covid-19) sa mga talatapan ukon ginatrabahuan.
Ini ang ginpahayag ni South Cotabato Provincial Health Officer Dr. Rogelio Aturdido Jr. matapos makapagkit sang 213 ka mga kumpirmado nga kaso sang Covid-19 ang yara sa napulo (10) ka opisina kun diin kadam-an sa mga ini ang nagikan sa government institutions.
Ginpakigbahin pa sini nga may yara man sang mga napagkit nga transmission sang virus gikan sa mga nagapatigayon sang party kag haya ukon lubong.
Dugang pa ni Aturdido nga ang pagsaka sang kaso sang Covid 19 ang bangud sa kapabayaan sa pagsunod sa mga minimum health standards.
Dugang pa sini nga tatlo ka adlaw antes pa makitaan sang sintomas sang Covid-19 ang isa ka tawo mahimo na ini nga makalaton sa sin-u-man nga ila makasalamuha.
Sa subong, padayon ang panawagan sang ila nga pamunuan nga sundon ang mga minimum health standards kag indi mangin kampante bangud wala pa tigayon nga madula ang virus sa probinsya mangin sa bilog nga pungsod.
