KORONADAL CITY – Posible nga may kaangtanan sa obra ang isa sa mga ginalantaw nga motibo sang Isulan PNP angot sa pagpatay sa isa ka opisyal sang kapulisan sa probinsya sang Sultan Kudarat.
Suno kay PLt. Col. Modesto Carrera, hepe sang Isulan PNP, ini ang isa sa mga ginalantaw nila nga anggulo magluwas pa sa iban nga mga motibo nga ila ginalantaw.
Apang nagpamalibad nga ibuyagyag sang opisyal ang iban nga detalye sang ila imbestigasyon bangud nagapadayon pa ang pagkolekta nila sang mga impormasyon.
Una diri, ginkilala ang biktima nga si Police Major Victorino Pansoy, Hepe sang Provincial Internal Affairs Service sang Davao Del Sur PNP kun sa diin sakay ang biktima sa iya ginamaneho nga duag pula nga Toyota Pick-up sa Purok Riverside Brgy Sampao Isulan Sultan Kudarat kaupod ang iya asawa kag bata.
Pag-abot sini sa Pama Boarding House, hinali ini nga ginluthang sang riding in tandem suspects usar ang kalibre 45 nga pistola.
Gilayon nga nagpalagyo ang mga suspek samtang dead on the spot si Major Pansoy makaligad gintadtad sang bala ang iya lawas.
Pilason naman ang bata ni Major Pansoy nga gilayon naman nga gindala sa isa ka ospital sa Koronadal City samtang luwas ang asawa sini.
Nahibaloan nga na-assign sadto sa Isulan PNP ang napatay nga police official.
