KORONADAL CITY– Ginhanduraw subong sang mga environmentalist sa probinsya sang South Cotabato ang dako nga papel ni anay Department of Environment and Natural Resources ukon DENR Sec. Gina Lopez sa pagpangapin sa kinaiyahan kadungan sang kumpirmasyon sang pagtaliwan sini.
Sa ekslusibo nga interbyu sang Bombo Radyo Koronadal sa isa sa mga kilala nga environmentalist sa probinsya kag malapit nga abyan sang anay tiglikom nga si Ex-South Cotabato board member Romulo Solivio, dako ang nabulig ni Lopez agud ipanawagan sa mga opisyal sa probinsya nga punggan ang coal mining sa Brgy. Ned Lake Sebu kag open pit mining sa banwa sang Tampakan, South Cotabato.
Dugang pa ni Solivio nga nangin tingog si Lopez sang mga lumad agud ipalab-ot ang ila pagpamalabag sa anuman nga sahi sang pagmina nga posible makaguba sa kinaiyahan.
Samtang, ginakabig naman ni Father Jerome Millan, direktor sang Social Action Center sang Diocese of Marbel nga dako nga kawad-an ang kamatayon sang anay tiglikom nga kaupod nila nga nagpanawagan nga punggan ang anuman nga sahi sang pagmina nga may malain nga epekto sa kinaiyahan kag ikaayong lawas sang mga pumuluyo ilabi na ang open pit mining.
Kadungan sini, nagpanawagan si Father Millan sa mga pumuluyo nga ikabuhi ang legasiya nga ginbilin ni Lopez nga maisog sa adbokasiya sa pagprotehir sa kagulangan kag kinaiyahan.
