KORONADAL CITY – Ginabantayan na sang pamunuan sang Moro Islamic Liberation Front (MILF) ang pagpasar sang Bangsamoro Basic Law sa kongreso makaligad nga nangin bukambibig man ini ni Pangulong Rodrigo Duterte antes nagbiya padulong sa Japan.
Kadungan sini ginpahayag ni Bangsamoro Transition Commision (BTC) chairman Ghadzali Jaafar nga ipatigayon nila ang Bangsamoro Assembly sa palaabuton nga Nobyembre 3-4, 2017 nga ipatigayon sa Old Capitol, Sultan Kudarat, Maguindanao.
Suno kay Jaafar, una kuntani nga naschedule ang nasambit nga pagtililipon kahapon apang wala ini madayon bangud sa problema sa nangin preparasyon sini.
Ginalauman ang pagtambong sang 1 milyon nga mga partisipante gikan sa Bangsamoro, non-Moro settlers, Indigenous People, government workers, NGOs, CSOs, Sultanates, LGUs kag mga foreign dignitaries.
Nagpanawagan man si Jaafar sa tanan nga ipadayon ang pagsuporta sa Bangsamoro Basic Law.
Nahibaluan nga ang BTC ang ginmanduan nga magpatigayon sang Bangsamoro Assembly base sa Executive Order No.08 sang expanded Bangsamoro Transition Commission.
