KORONADAL CITY – Suportado sang Presidente sang League of Municipalities of the Philippines – South Cotabato Chapter ang manipesto nga nagapanawagan sang Transparency kag accountability sang mga opisyal nga naulamid sa kontroberyal nga P350B flood control projects sa Pilipinas.
Ini ang ginkumpirmar ni Tampakan Mayor Leonard Escobillo ang naga tindog nga League of Municipalities of the Philippines – South Cotabato Chapter sa interview sang Bombo Radyo Koronadal.
Suno ka Escobillo, tinutuyo sang nasambit nga manipesto nga mapanabat ang mga corrupt nga mga opisyal sang gobyerno nga yara sa likod sang P350B flood control projects sa diin tuman ka dako nga balor kag madamo na sang mahimo labi na sa mga sektor nga mas nagakinahanglan.
Ginpangunahan ini sang mga alkalde nga miyembro sang Mayors for Good Governance (M4GG) ang panawagan pinaagi kanday Mayor Benjie Magalong sang Baguio City, Mayor Vico Sotto sang syudad sang Pasig, Mayor Joy Belmonte sang syudad sang Quezon, kag Mayor Sitti Hataman sang Basilan.
Sa joint statement sang M4GG, ginpahayag sang mga ini nga naga ugyon ang ila nga grupo sa pumuluyong Pilipino nga naga panawagan sang Transparency,accountability kag Justice kaangot sa anomalya kag alegasyon sang palpak nga flood Control projects kag lakip man ang ginakabig nga ghost projects sang gobyerno sang Pilipinas.
Ginahingyo man sang ila nga manipesto nga makilala ang mga kongresista kag mga kontratista ukon sin-o man nga mga opisyal sang gobyerno nga naga nagkomplutanay sa pagkamkam sang kwarta sang mga Pilipino.
Magluwas pa diri, luyag man sang M4GG nga ipaathag sang Department of Public Works and Highways (DPWH) kag National Government ang tanan nga detakye sang proyekto lakip na ang Program of Work, Detailed Unit Price Analyses, Bill of Quantities, kag Feasibility Studies kag labi sa tanan, ang pangalan sang tanan nga mga pangalan sang mga opisyal nga imbolbado sa pagbulsa sang kwarta sang mga Pilipino.
Madumduman nga sa ika-apat nga State of the Nation Address (SONA) nga Pangulong Ferdinand Marcos Jr. ginbuyagyag sini nga may mga palpak kag ghost flood control projects ang gobyerno kag nagpaandam ini nga magapanabat ang tanan nga opisyal nga may kahilabtanan diri.
