Nagapadayon sa subong ang imbestigasyon sang mga kapulisan sang Cotabato Police Provincial Office angot sa insidente sang pagpanghaboy sang granada sa bahin sang banwa sang Pikit, Cotabato partikular na sa isa ka residential house sa Lozada Street, Poblacion.
Ginkilala ni PLt. James Warren Caang- Spokesperson sang Cotabato Police Provincial Office sa interview sang Bombo Radyo Koronadal ang nagapanag-iya sang puluy-an nga si Abdulfatah Mamasabulod Dalid, isa ka manunudlo sang isa ka religious subject sa Notre Dame of Pikit.
Suno kay Caang, ginhabuyan sang wala ka makilal-an pa nga mga suspek ang balay sang biktima.
Masuwerte naman nga wala sang napilasan sa nasambit nga panghitabo.
Madasig naman nga nagpalagyo ang mga suspek makaligad nga ginhimo ang krimen.
Ginpahayag man sang mga otoridad nga wala man sang may nabaton nga pamahog ang biktima antes ang krimen.
Padayon naman sa subong ang pagkuha sang mga otoridad sang mga pahayag sang mga witness sa panghitabo lakip na ang CCTV footages nga makbulig sa krimen.
Posible naman suno pa nga nasal-an ang balay sang biktima nga balay sang target sang mga suspek.
