KORONADAL CITY– Nagapatigayon na sa subong sang validation angot sa danyos sang El Nino sa probinsya sang South Cotabato ang Provincial Disaster Risk Reduction and Management Office (PDRRMO).
Ini ang ginpahayag ni South Cotabato PDDRMO Officer Mila Lorca.
Suno kay Lorca, tinutuyo sang nasambit nga validation nga mahibaluan kun kinahanglan nga ideklarar ang state of calamity sa bilog nga probinsya.
Ini matapos ang una nga pagpaidalom sa state of calamity sa mga banwa sang Surallah kag T’boli kun diin naglab-ot sa masobra P47 million pesos ang naguba nga mga pananum tuga sang tag-ilinit.
Dugang pa ni Lorca nga kun tigayon nga madeklarar state of calamity sa probinsya, magamit na ang calamity fund para sa mga apektado nga mangunguma.
Samtang, ginsuspender anay sang provincial agriculture office ang paghatag sang planting materials sa mga mangunguma bilang pagpatuman sang “plant now pay later scheme” sa South Cotabato.
Paathag pa ni Provincial Agriculturist Justina Navarete, ini ang bangud sa weak El Nino Phenomenon kag election ban.
Kadungan sini, ginpasiguro ni Navarete nga nakahanda sila nga ipadayon ang paghatag sang seedlings pagkatapos sang eleksyon kag kun mag-ayo na ang panahon sa Mayo.
