KORONADAL CITY – Dako ang pagpati ni Atty. Nena Santos, private prosecutor sang Maguindanao massacre nga may kaangtanan sa trial ang motibo sa pagpang-ambush sa mga testigo sa national highway sa banwa sang Tantangan South Cotabato pasado-alas 10 kaina sang aga.
Sa interbyu sang Bombo Radyo Koronadal kay Atty. Santos, makapila ka bes man nga ginhana nga pahipuson si Mohammad Sangki, ang nagapanguna nga witness sa masaker kag iban pa nga testigo sa krimen.
Suno pa kay Santos, halin sa siyudad sang Tacurong ang salakyan ni Sangki kaupod ang driver kag duha nga iban pa pakadto sa General Santos Airport pabalik kuntani sang Metro Manila sang gin-ambush sa national highway sa banwa sang Tantangan sang mga suspek nga nakasakay sa itom nga Montero.
Ginkumpirmar naman ni Police Col. Jemuel Siason, provincial director sang South Cotabato, nga dead on arrival na sang nag-abot sa ospital si Richard Escovilla , DOJ personnel kag detailed driver suno pa sang mga testigo sa idalom sang Witness Protection Program (WPP) -DOJ.
Gindala naman sa ospital kag ginabulong ang iban pa nga sakay sang Toyota Innova bangud sa impact makaligad nga nagbunggo ini sa isa ka kalan-an kag yara na sa luwas nga sitwasyon ang mga ini.
Sa subong nagapadayon ang imbestigasyon sang mga otoridad sa nasambit nga panghilitabo.
