Makabig nga isa ka “political decision” ang ginhimo ni Presidente Ferdinand Marcos Jr. nga pagtugot sa pag implementar sang Interpol sang Arrest Warrant diri sa Pilipinas batok kay Former President Rodrigo Duterte.
Ini ang nangin pahayag ni Atty. Gerard Mosquera- Former Deputy Ombudsman For Luzon sa interview sang Bombo Radyo Koronadal.
Suno sa iya, mahimo man tani nga magpamalibad ang gobyerno sang Pilipinas sa kooperasyon sa Interpol batok sa ini nga kaso kag magpahayag nga indi naman miyembro sang ICC ang pungsod Pilipinas bangud naghalin naman ini apang bangud nagpasugod man ang presidente nga magkooperar sang interpol kabangdanan sang pagka-arestar sa anay presidente.
Gintumod man sini nga wala sang iban nga nag desider sang pagtugot sa pagsulod sang interpol sa Pilipinas kundi si Presidente Ferdinand Marcos bangud ini man ang official nga representative sang Pilipinas.
Madumduman nga ginpaklaro ni President Ferdinand Marcos Jr. nga wala sing paglapas nga natabo kag legal ang pagka-aresto kag pag-turnover sa International Criminal Court (ICC) batok kay anay Presidente Rodrigo Duterte.
Suno sa Presidente, nasunod lang nila ang tama kag legal nga proseso sa pagserbi sang warrant kag pagbasa sa iya mga katungdanan.
Ginpasiguro pa sang Presidente nga nagakoooperar lang ang Pilipinas sa International Criminal Police Organization (Interpol) kag indi ang ICC.
Nagdistansya man ang Presidente kag nagsiling nga ang pag-aresto sa anay Presidente indi isa ka pamulitika, kag iya man ginpahayag nga ang kaso nagluntad pa sang 2017 antes pa nangin presidente si Marcos.
