Madinag-on ang paglunsar sang P20 kada kilo nga rice program sang gobyerno sa Cebu kahapon nga ginpangunahan sang Department of Agriculture, kun sa diin ginpasidunggan sang mga nakabakal nga maayo ang kalidad sang bugas nga ila nakuha.
Suno kay Palace Press Officer USec. Claire Castro, madamo ang nakabenepisyo sa nabaligya nga barato nga bugas.
Ginpaklaro man ni Castro nga ang rollout sang P20 kada kilo nga bugas amo lang sa Cebu, kag ginabaligya ini sa mga Kadiwa Centers.
Suno pa sa iya, wala pa sang rollout sang P20 kada kilo nga bugas sa Metro Manila kag sa iban pa nga parte sang pungsod.
Ginsiguro ni Castro nga may igo nga suplay sang bugas ang gobyerno para sa nasambit nga programa.
Ginpasalig man sang opisyal nga himuon sang gobyerno ang tanan agud magpadayon ang programa.
Suno sa iya, hasta sa katapusan sang tuig kaya sustenihan sang gobyerno ang baligya sang P20 kada kilo nga bugas.
Bisan pa sini, igalakip na sa national budget para sa masunod nga tuig ang pondo para sa rice subsidy.
