KORONADAL CITY- Hugot nga nagpaalinton sa publiko ang pamunuan sang Koronadal City Health Office nga likawan ang pagtilaw ukon pagkaun sang mga halad nga mga pagkaun nga ginabutang sa pansyon sa mga sementeryo.
Sa interview sang Bombo Radyo Koronadal kay Ms. Mylene Seliote, Health Education and Promotions Officer III sang Koronadal City Health Office ginpahayag sini nga delikado para sa isa ka indibidwal ang pagtilaw sang mga halad para sa mga patay bangud posible nga exposed ang mga ini sa mga nanari-sari nga mga mikrobyo ukon kagaw kag higko nga mahimo nga magtuga sang pagpalanakit sa tiyan ukon food poisoning sa sin-o man nga indibidwal nga magkaon sini.
Dugang pa ni Seliote, mas manami nga magkaon sang pagkaon nga ginpreparar kag ginbutang sa mga matinlo nga pinggan.
Nagpahanumdom man ini nga magbalon sang tubig bangud sa mainit nga paniempo kag magdala sang payong ukon jacket agud madepensahan ang panit batok sa init sang adlaw.
Ilakip man ang mga maintenance nga mga bulong sa pagpadulong sa tagsa tagsa ka lugar sa tion sang Todos Los Santos kag Kalag-kalag.
