Nagpanawagan si Senadora Risa Hontiveros sa Department of Foreign Affairs (DFA) nga ikansela na ang Philippine passport ni Alice Guo, matapos nga madiskubre nga nakaguwa na ini sa pungsod.
Suno kay Hontiveros, dapat himuon nga null and void dayon ang passport ni Guo.
Kahapon, sa privilege speech ni Hontiveros, ginbahagi niya ang impormasyon halin sa National Bureau of Investigation (NBI) nga nagsulod si Guo sa Malaysia sang Hulyo 18 kag pagkatapos nagpadulong sa Singapore sang Hulyo 21.
Ginsiling ni senadora, dapat sang nakumpirmar nga peke ang iya pagka-Pilipino, gin-kansela na dayon ang pasaporte ni Guo.
Suno pa sa iya, ang kapaltahan sa pagdakop kay Guo nagapakita lang sang kakulangon sa interagency coordination.
Naghatag pa si Hontiveros sang paandam nga indi niya pagpalampason nga mapasabat ang mga opisyal sang gobyerno nga nagpahanugot kay Guo nga magpalagyo kag magbiya sa pungsod.
