KORONADAL CITY – Ginpahayag sang Department of Education nga ang mga senior high school students nga apektado sang pagpa-untat sang programa sa mga state kag local universities and colleges ang sarang nga makatransfer sa mga public schools nga naga-offer sang basic education.
Ini ang nangin pahayag ni Ms. Ma. Theresa Hallegado, ang Spokesperson sang DepEd South Cotabato Division sa interbyu sang Bombo Radyo Koronadal.
Suno sa ya, base sa nangin pahayag ni Usec Poa ang displaced SHS learners ang may option man nga mag-enroll sa pribado nga mga eskwelahan sa masunod nga tuig kag mag-avail sang voucher program.
Kung madumduman, una na nga nagpagwa sang isa ka memorandum ang Commission on Higher Education nga nagareiterate sang engagement sang State University Colleges kag Local University Colleges sa basic education paagi sa Senior High School kun sa diin pagalimitahan lamang ini sa K-12 transition period humalin School Year 2016-2017 tubtob School Year 2020-2021.
Suno sa CHED, nag-issue na ang DepEd sang isa ka notice paagi sa Private Education Assistance Committee nga wala na sang Government Assistance sa mga estudyante kag manunudlo sa Private Education beneficiaries nagikan sa State University Colleges kag Local University Colleges sumugod 2023-2024 magluwas lamang sa mga magasulod sa Grade 12.
