KORONADAL CITY – Mas labi pa nga nahadlok ang mga Overseas Filipino Workers (OFW) indi lamang sa pungsod Kuwait kundi mangin sa iban pa nga lugar sa Saudi Arabia,matapos nadiskubrihan ang bangkay sang isa ka Filipina sa freezer.
Ini ang ginpahayag ni Elvie Suela, isa ka Pinay DH nga yara sa Riyadh, Saudi Arabia kag kasamtangan nga nakaeksperiensiya man sang pagpang-abuso sa iya nga mga employer.
Sa ginpalab-ot nga impormasyon ni Elvie sa Bombo Radyo Koronadal, wala mabalaka ang iya nga mga employer sa paandam ni Pangulong Rodrgio Duterte nga pagpatuman sang total deployment ban sa Kuwait kag iban pa nga pungsod sa middle east sa baylo mas ginpahugtan pa siya kag ginpabudlayan.
Ang malain pa ginabaliskad siya kag ginabasol ang tanan nga mga palpak nga trabaho sa iya apisar indi siya ang may kahimuan.
Dugang pa sini, dapat lamang nga mangin matutom ang OWWA kag POEA sa pagsiguro nga luwas ang mga Pinay DH sa Saudi bangud sila ang makaluluoy.
Si Elvie ang isa lamang sa mga OFW nga naghingyo sang bulig nga makapauli sa pungsod bangud sa pagpangmaltrato sang iya mga employer.
Una naman nga naghingyo sang bulig ang pamilya ni Elvie sa waragwagan sang Bombo Radyo Koronadal bangud sa iya nga sitwasyon.
Sa subong, nagapanawagan si Elvie kay Pangulong Duterte nga buligan siya kag ang iban pa nga mga Pinay DH nga biktima sang pagpang-abuso sa Middle east.
