KORONADAL CITY – Nagapanawagan ang Diocese of Marbel sa tanan nga mga tumuluo nga mangin mabakod sa anuman nga problema nga ginapangatubang labi na subong sa tion sang pandemiya tuga sang covid-19 virus.
Ginhimo ni Bishop Cirilo Casicas ang nasambit nga pahayag sa iya nga homiliya kadungan sang pormal nga pag-umpisa sang misa de gallo subong nga adlaw, Disyembre 16.
Suno kay Bishop Casicas, magluwas sa pagpangayo sa Mahal nga Makaako sang kabaskog para sa mga hangkat sa kabuhi sa tunga sang pandemiya, kabay man nga mangin abri kita sa hibubun-ot sang mga pigado kag may balatian nga tuman nga naapektohan sang pandemiya subong.
Panawagan sini nga kuntani ipaiway anay ang personal nga interes kag buligan nga ipangamuyo ang sitwasyon sang aton mga isigkatawo nga yara sa malala nga sitwasyon.
Sa baylo suno pa nga magreklamo kag magbasolanay sa nagakatabo subong sa kalibutan, dapat na lamang nga ipasalamat ang amat-amat nga pagbangon sa hangkat sang kabuhi.
Isa lamang suno pa ang covid-19 virus sa mga hangkat nga ginhatag sang Mahal nga Makaako agud mangin mabakod pa ang aton pagsalig sa Iya.
Nahibaloan nga hugot man ang ginapatuman nga minimum health standards sa pagtambong sang mga tawo sa simbahan kun sa diin 50 porsyento lamang sang mga tawo ang ginapahanugotan nga magkadto kag ginaobserbahan ang social distancing.
