KORONADAL CITY– Apektado man subong ang rubber, banana kag corn industry sang Tulunan, North Cotabato makaligad ang asud-asod nga linog nga nag-igo sa Mindanao.
Sa interbyu sang Bombo Radyo Koronadal sa Brgy. chairman sang Brgy. Bituan, Tulunan, North Cotabato nga si kapitan Levina Pajanilag, pinakaapektado ang ila barangay kun ekonomiya ang paga istoryahan bangud ginatos ka ektarya sang talamnan sang rubber, mais kag saging ang natabunan sa nagluntad nga landslide.
Bangud sini yara sa masobra 1,000 ka indibidwal ang nakabatyag subong sang tuman nga kapigaduhon makaligad ang linog kun sa diin kadamuan sa local farmers sa ila lugar ang nanugon sa minilyon nga pagkalugi sa ila mga pananom ilabi na nga nagahilapit na kuntani ang harvest season.
Nagakahadlok man ang mga ini nga magbalik sa ila nga talamnan ilabi pa nga nagapamahog sa gihapon ang pagtiphag sang duta bangud nabatyagan sa gihapon ang pagtay-og.
