KORONADAL CITY- Simbolo sang paghugpong kag patas nga sistema ang pagka-angkon sang Moro, Kristiyano kag Lumad sa Bangsamoro Transition Authority (BTA) para sa Bangsamoro Autonomous Region in Muslim Mindanao (BARMM) nga ginalauman nga ilunsar sa palaabuton nga Pebrero 21, 2019.
Ini ang ginpasiguro ni MILF Vice chair for Political Affairs Ghadzali Jaafar sa eksklusibo nga interbyu sang Bombo Radyo Koronadal.
Apang suno kay Jaafar magadepende sa gihapon ini sa paga-abrubaran nga pinal nga listahan ni Pangulong Rodrigo Duterte.
Bangud sini, nagalaum ang pamunuan sang MILF nga madayon ang pormal nga pag-anunsyar ni Pangulong Duterte sa paglunsar sang BTA nga temporaryo nga magadumala sa transitional government sang BARMM halin sa anay Autonomous Region in Muslim Mindanao o (ARMM).
Ginpa-athag pa ni Jaafar nga ang paglunsar sang BTA ang senyales sa pagdihon sang BARMM para sa tigayon na nga pagpatuman sang Bangsamoro Organic Law.
Kadungan sini, gin-ako ni Jaafar nga indi madali ang proseso sa pagbag-o sang gobyerno rason nga ginhingyo nila ang kooperasyon sang mga taga-Mindanao.
