KORONADAL CITY- Ginalauman na sang militar nga may dako nga epekto sa panawagan nila nga magsungka ang mga rebelde kadungan sa plano nga pagdeklarar ni Pres. Rodrigo Duterte sa grupo nga New People’s Army bilang terorista nga grupo.
Sa interbyu sang Bombo Radyo Koronadal kay 33rd Infantry Battalion commander Lt. Col. Harold Cabunoc, subong pa lang nadugangan pa ang mga rebelde nga nagapabutyag nga luyag nila nga magbalik sa gobyerno ilabi na gna tigayon na nga ginsarado ni Pres. Duterte ang pakig-angot sa NPA.
Dugang pa sini nga nangin positibo ang epekto sang ginaduso kag natalana nga deklarasyon sa NPA bilang terorista nga grupo bangud mas napaathagan suno pa ang mga katapo sini nga pila ka tuig na sila nga ginatonto sang nasambit nga grupo nga nagpromisa nga pagahatagan sila sang kauswagan.
Nahibaluan nga sa bag-o nga datus sang 33rd IB yara sa 66 na ang mga nagsungka nga rebelde halin sa Sen. Ninoy Aquino kag Bagumbayan Sultan Kudarat kun sa diin kadamuan nga mga nagsungka ang mga lumad.
