KORONADAL CITY – Ginkumpirmar sang Singaporean government nga nagikan suno pa sa isa ka dako nga dormitoryo ang paglapta sang makalalaton nga coronavirus disease.
Ini ang ginpahayag ni Annie Tampus Dano, isa ka OFW sa pungsod Singapore apang tumandok sang Davao de Oro sa eksklusibo nga interbyu sang Bombo Radyo Koronadal.
Suno kay Dano, nag-umpisa suno pa ang paglapta sini sa isa ka hulot nga may 12 ka tawo ang yara sa sulod sini kag naglapta sa nasambit nga dormitoryo.
Ginbuyagyag sini nga 60 sa mga ini ang mga Pilipino nga mga permanente nga residente na sang pungsod kun sa diin 30 diri ang kasamtangan pa nga nagapabilin sa ospital.
Nahibaloan nga ang nasambit nga 20,000-room capacity nga dormitoryo ang ginapuy-an sang nagkalain-lain nga rasa kag kadam-an sa ila ang nagaobra sa konstruksyon kag paglimpyo.
Ginpasiguro naman ni Dano nga wala naman nagapabaya sa ila ang Singaporean government kun sa diin ila nga ginasabat ang pagpaospital kag paghatag sang allowance sa mga apektado nga indibidwal.
Sa subong ginpaidalom ang Singapore sa circuit break status ukon lockdown bilang tikang sa pagtapna sa paglapta sang covid-19 nga ginpalawig tubtob sa bulan sang Hunyo.
