KORONADAL CITY– Ginkumpirmar ni Atty. Nena Santos, legal counsel sang Maguindanao Massacre victims ang pagbiya ni Atty. Raymond Fortun kag sang law firm sini bilang counsels sang ginasiling nga utok sa likod sang Maguindanao Massacre nga si Andal Ampatuan Jr. antes pa man ang nagahilapit nga pagtakop sang trial.
Nahibaluan nga nagsang-at sang motio for withdrawal si Fortun kag ang law firm sini sang nakaligad nga Hulyo 29 nga nangin rason agud mapaslawan nga makasumiter sang memorandum si Ampatuan bilang ulihi nga pleading sini nga may kaundana kun tani sang tanan nga argumento batuk sa mga ginpresentar nga ebidensya antes pa man masumiter para sa desisyon ang multiple murder case nga ginapangatubang sini.
Ginkuwestiyon naman sang prosekusyon kag sang himata sang mga biktima ang timing kag ang motibo sa pagbiya ni Atty. Fortun nga posible suno pa nga mangin delaying tactics ni Ampatuan.
Sa karon si Armando Cura ang gin appoint sang korte bilang counsel de officio ni Ampatuan.
Kun madumduman si Andal Ampatuan Jr. ang primary suspect nga gina akusaran nga mastermind sa nagluntad nga madinuguon nga masaker nga nag ugat sa political rivalry nila ni Esmael “Toto” Mangudadatu sa pagka gobernador sang Maguindanao nga nagresulta sa kamatayon sang 58 ka persona lakip na ang media workers na ginbansagan nga worst election-related incidents and press killings sa maragtas.
