KORONADAL CITY– Nangin mapinasalamaton ang Obispo sang Diocese of Marbel sa nangin desisyon sang Gobernador sang South Cotabato nga pagveto sa nahauna nga tikang sang Sangguniang Panlalawigan sang probinsya nga amiyendahan ang EnviCode sang probinsya kag tugutan na ang pagpatigayon kag pag-operar sang open pit mining sa probinsya.
Sa pahayag ni Most Rev. Cerilo Casicas , Obispo sang Diocese of Marbel, ginpakita kag naga pamatoud lamang nga luyag sang Gobernador sang probinsya nga mapanalipdan ang ikaayo sang kadam-an sang mga pomuluyo sa South Cotabato pinaagi sa pag usar sang iya nga gahom nga e-veto ang desisyon sang SP.
Dugang pa sini, ang veto ni South Cotabato Governor Renaldo Tamayo Jr., ang isa man ka mapag-on nga patimaan sang isa ka naga pamati nga opisyal nga nkabati sang mulo sang tawo.
Madumduman nga Nagdesisyon si South Cotabato Governor Reynaldo Tamayo Jr nga e-veto ang amended ordinance sa Environment Code sang South Cotabato partikular na ang naga-lift sang ban sa open pit mining sa probinsiya.
Suno kay Governor Tamayo sa ginsumiter nga ordinansa sang Sangguniang Panlalawigan nakita sini nga gindalian kag wala maplastar sang maayo.
Apang, antes pa man sini ginpaguwa ang iya desisyon ginpaathag sini nga ang national government ang nagahatag sang pahanugot sa “large scale mining”.
Ginhan-ay pa sini ang mga desisyon nga ginpaguwa sang DENR sang December 2021 nga nagadula sa ban sang open pit mining sa pungsod sa rason nga pahanugutan na ang dalagko nga pagmina bangud sa ginalantaw nga makabulig ini sa pagbangon sang ekonomiya bangud sa epekto sang Covid-19.
