KORONADAL CITY– Nagpahayag sang pagkadismaya si Bayan Muna Representative Carlos Isagani Zarate sa pagbasura sang appointment ni DSWD Sec. Judy Taguiwalo paagi sa nangin desisyon sang Commission on Appointments.
Sa ekslusibo nga interbyu sang Bombo Radyo Koronadal sa mamalidha, ang nangin desisyon sang CA ang nagapakita lamang sang bulok nga sistema sang pila ka ahensya sang gobyerno bangud wala man lamang suno pa nakit-an sang nasambit nga ahensya ang kontribusyon sang tiglikom sa pagbulig sa mga pigado ilabi na sa nagapadayon nga Marawi Siege.
Suno kay Zarate, si Taguiwalo ang makabig nga public servant nga wala sang lamod sang kurapsyon, handa nga magbulig sa mga nagakinahanglan kag handa man nga magsakripisyo para sa mga pumuluyo nga pigado.
Kaangot sini, pola sa mga ginatan-aw nga rason sa pagbasura sang appointment ni Sec. Taguiwalo ang pagpamatok sini sa Pork Barrel Fund,ginaduso nga Tax Reform Bill kag amo man ang pagka leftist sini okun koneksyon sa National Democratic Front (NDF) nga aktibo sa mga ginapatigayon nga hublag protesta sang rehimeng Marcos.
Nahibaluan nga si Taguiwalo ang ikatatlo na sa myembro sang gabinete ni Pres. Rodrigo Duterte nga ginbasura sang CA ang appointment nga ginalakipan nanday anay DENR Sec. Gina Lopez kag DFA Sec. Perfecto Yasay.
