Dako ang paghinulsol sang magulang nga nagluthang-patay sa iya manghud sa bahin sang Purok. Mabinuligon, Brgy. Topland, Koronadal City.
Sa interview sang Bombo Radyo Koronadal Kag. Molmol Ayoyon sang Barangay Topland, Koronadal City, iya ginpahayag nga nagtakop sa trahedya ang binaisay ang duha ka mag-utod matapos ang pila ka oras nga pag-inom kag nagtuga sang pagpangluthang sa Purok Mabinuligon.
Ginkilala sang mga otoridad ang biktima kay alyas Jim, 22 anyos, samtang ang suspek amo ang iya magulang nga si alyas Vicente, 32 anyos.
Suno sa inisyal nga imbestigasyon, nagainom ang duha halin pa alas-5 sang hapon antes nagluntad ang komprontasyon nga nagtapos sa gin-alegar nga pagpangluthang sang magulang sa iya manghud.
Tatlo ka igo sang bala ang naagom ni Jim sa iya lawas nga gintunaan sang iya gilayon nga kamatayon.
Narekober naman sa crime scene ang duha ka basyo sang ginapatihan kalibre .45 nga armas-luthang.
Ginpahanumdom ni Kag. Molmol ang publiko nga likawan ang sobra nga pag-inom sang makahulubog nga ilimnon, ilabi na kon mahimo ini nga magresulta sa pagbaisay ukon indi husto nga mga desisyon.
Sa karon, yara na sa kustodiya sang Koronadal City PNP ang suspek kag ginpasakaan sang kaso nga murder, samtang nagapadayon ang nagakaigo nga proseso sa kaso.
