Nagpagwa ang Department of Agriculture (DA) sang moratorium sa pag-import sang mga domestic kag wild bird lakip na sang mga poultry product gikan sa Indiana, USA bangud sang avian influenza outbreaks.
Sa ginpagwa nga import restriction ni Agriculture Secretary Francisco Tiu Laurel, Jr., naga-epekto man ang import ban sa karne sang manok, day-old chicks, itlog, kag semilya para sa artificial insemination sang mga manok.
Suno sa DA, katuyuan sang amo nga tikang nga maproteheran ang multibillion-peso nga poultry industry sang pungsod gikan sa posible nga paglapta sang highly pathogenic H5N1 avian influenza strain.
Samtang, ginpaathag naman sang departamento nga exempted sa import ban ang mga kargamento nga yara sa transit ukon sa mga pantalan antes pa man ang natumod nga mandu sa kondisyon nga gin-ihaw ukon ginhimo ang mga produkto antes ang January 30, 2026.
