KORONADAL CITY – Ginakabig nga retaliatory attack sang Bangsamoro Islamic Freedom Fighters (BIFF) Dawlah Islamiyah terrorist group ang ginhimo nga pag-atake sa detachment sang militar sa Butalo Bridge, Barangay Butalo Datu salibo, Maguindanao Del Sur nga nagresulta sa pagkapatay sang isa ka suldalo kag pagkapilas naman sang isa pa.
Ini ang ginpahayag ni Col. Oriel Pangcog, commander sang 601st Brigade, Philippine Army sa interview sang Bombo Radyo Koronadal.
Ginkilala ang napatay nga suldado nga si Corporal Allan Balena, taga Carmen North Cotabato nga na-assigned sa 6th Infantry Batallion kag nadeklarar nga killed in action matapos maigo sa ulo samtang luwas naman ang isa pa ka suldado nga ginabulong subong sa hospital.
Suno pa kay Pangcog, naigo si Balena bangud naguwa ini sa detachment kag nakig-atubang sa mga nakaengkwentro nga BIFF kag Dawlah-Islamiyah.
Dugang pa sang opisyal, bangud sa insidente madamo nga sibilyan ang temporaryo nga nagbakwit agud nga indi malamita sa engkwentro.
Dugang pa sang opisyal, nagdugay sang masobra naopulo ka minutos ang kambyuhanay sang lupok sa duha ka bahin.
Nagpalagyo naman ang yara sa masobra napulo ka terorista nga nakaengkwentro sang mga suldado.
Narekober naman pagkatapos sang engkwentro ang mga IED kag Granada.
Sa subong, nagapadyon ang operasyon sang militar batuk sa mga BIFF kag Dawlah Islamiyah nga nagpangharass sa nasambit nga detachment.
