Nagakaangay nga dumdumon sang mga lamharon nga mga kabataan ang tion sang pagkapatay ukon pag assasinar kay Senator Ninoy Aquino bangud isa ini sa mga parte sang maragtas sang Pilipinas maykaangtanan sa maisog nga mga tikang sa pagpalangga sa pungsod.
Ini ang nangin pahayag ni Professor Danilo Arao – UP Professor sa interview sang Bombo Radyo Koronadal.
Suno sa iya, isa ka maisog kag halangdon nga personalidad si Ninoy Aquino nga nagpakigbato para sa ikaayo sang pungsod.
Madumduman nga gintiro sa ulo ang lider sang oposisyon nga si Sen. Benigno “Ninoy” Aquino Jr. samtang nga gina-escort sang pila ka mga suldado sa guwa sang China Airlines Flight 811 sa international airport sang Manila.
Nagpauli si Ninoy sa Pilipinas matapos ang iya tatlo ka tuig nga pagtinir sa Estados Unidos.
Ang pagpatay kay Ninoy ang nagresulta sa malapnagon nga mga protesta nga naglab-ot sa EDSA People Power sadtong 1986.
“𝘐’𝘥 𝘳𝘢𝘵𝘩𝘦𝘳 𝘥𝘪𝘦 𝘢 𝘮𝘦𝘢𝘯𝘪𝘯𝘨𝘧𝘶𝘭 𝘥𝘦𝘢𝘵𝘩 𝘵𝘩𝘢𝘯 𝘭𝘦𝘢𝘥 𝘢 𝘮𝘦𝘢𝘯𝘪𝘯𝘨𝘭𝘦𝘴𝘴 𝘭𝘪𝘧𝘦,” ang nangin mensahe ni Ninoy sa iya mga pamilya kag abyan nga nagaprotesta para sa iya pagbalik sa Pilipinas 41 ka tuig na ang nagligad.
Gin-usar niya ang ngalan nga Marcial Bonifacio sa travel documents bilang kombinasyon sang ‘martial law’ kag sang ‘Fort Bonifacio’ sa diin siya ginpreso.
