KORONADAL CITY- “Home sweet home”, ini ang pahayag ni Father Teresito “Tisoy” Suganob sa iya nga pagbalik sa probinsya sang South Cotabato kun sa diin indi sini mapa-athag ang kalipay nga nabatyagan.
Sa ekslusibo nga interbyu sang Bombo Radyo Koronadal kay Father Tisoy, indi sa gihapon ini makapati nga makabalik pa ini sang buhi sa iya nga pamilya sa Norala,South Cotabato makaligad ang matapos ang lima ka bulan nga airstrike kag mga bala nga ila ginlikawan matapos mangin bihag sang terorista nga Maute-ISIS sa Marawi City.
Suno kay Father Tisoy, ginakabig sini nga milagro halin sa mahal nga maka-ako ang pagkasurvive sini sa gyera kag nagpasalamat sa tanan nga mga nagpangamuyo agud masalbar ang iya kabuhi.
Nagapabilin nga preska sa gihapon sang panghuna-huna ni Father Teresito “Tisoy” Suganob ang mapait kag makaharadlok nga eksperyensya sini sang mag-ibwal ang gyera sa Marawi City kun sa diin isa ini sa mga nangin bihag sang terorista nga Maute-ISIS.
Sa ekslusibo nga interbyu sang Bombo Radyo Koronadal, indi sini malipatan ang adlaw-adlaw nga airstrike sang militar batuk sa Maute-ISIS nga nagbihag sa ila kag ang paglikaw sa mga bomba kag bala nga daw kasubong sa ulan lang nga nagatulo.
Dugang pa, mapait man ang gin-agyan, nagapabilin nga mapag-on ang pagtuo sini sa mahal nga maka-ako nga nangin dipensa naman sini sa katalagman.
Nagapati si Father Teresito “Tisoy” Suganob nga dako ang bulig sang pagpangamuyo halin sa mga kaparian, religious sector, mga himata kag iban pa rason nga naluwas ini sa pihak sang tuman ka nubo nga tion nga mabuhi pa sa nasambit nga gyera.
Suno kay Father Tisoy, wala na sini ginlauman pa nga mabuhi kag ginbaton na sini ang kamatayon bangud nahibaluan sini nga tuman ka budlay ang iya sitwasyon kaupod ang iban pa nga mga bihag sa kamot sang Maute-ISIS.
Samtang sa pihak sini, tuman nga kalipay ang iya nabatyagan bangud buhi ini sa gihapon kag paga usaron sini ang tion nga ipalapnag ang pagsalig sa mahal nga maka ako pinaagi sa eksperyensya sini sa Marawi siege.
