KORONADAL CITY- Nagapadayon sa gihapon sa subong ang pagtumod sang mga otoridad sa posible nga may kahimuan sa pagpapaantos kag pagpatay sa isa ka padre-de-pamilya nga nasapwan nga naga huray-ad kag wala na sang kabuhi sa kilid sang dalan malapit sa kapinyahan sa bahin sang Crossing Kablon, Tupi, South Cotabato pasado ala-una kahapon.
Sa interview sang Bombo radyo kay Manong Elmer Dawang , himata sang biktima, positibo nga ginkilala sini ang nasapwan nga si Jay-R Ula residente sang nasambit nga lugar, 34 anyos, may-asawa kag 3 ka bata kag isa suno pa ka caretaker sang isa ka duta sa nasambit nga lugar.
Suno sa iya, natingala na lang suno pa ang pamilya sang biktima nga wala na ini nakapauli halin pa kagab-i.
Nakibot na lamang ang mga ini sang nasapwan ang lawas sang bikima nga wala na sang kabuhi kilid sang dalan malapit sa kapinyahan sa bahin sang Crossing Kablon.
Suno pa kay manong Elmer posible nga ginpaantos anay ang ila nga himata antes nga ginpatay.
Gingurot ang matalom nga bagay ang li-og sang biktima nga nangin tunaan sang iya nga mapait nga kamatayon, magluwas pa diri, ginkuhaan pa sang mga kuko sa tudlo sang tiil ang biktima nga ginpatihan man nga gin pulpog-anay sang matig-a nga bagay.
Magluwas pa diri, narekober man malapit sa biktima ang iya ginapanag-iyahan nga isa ka unit sang honda XRM nga pula kag ara man ang pitaka sini apang wala na ang iya cellphone.
Ginalantaw naman sa subong ang pila ka mga motibo sang krimen.
Antes suno pa ang krimen sandig kay Manong Elmer, may nakaba-is suno pa ang biktima.
Sa subong, ara na sa morgue ang patay nga lawas sang biktima, samtang naga padayon naman ang imbestigsyon sang mga otoridad.
