Nasapwan nga patay ang isa ka Padre de pamilya sa irrigation canal sa bahin sang Purok Sampaguita, Barangay Avanceña, Koronadal City nga ginkilala naman kay James Dayaganon, 42 anyos kag residente sang nasambit nga lugar.
Sa eksklusibo nga interview sang Bombo Radyo kay Jescel Dayaganon, bata sang biktima, duha ka adlaw na nila nga ginapangita ang ila amay kag nakibot na lamang sila nga nasapwan ini sa kanal nga wala na sang kabuhi pasado alas-6 sang aga, Agusto 18, 2023.
Suno kay Jescel, malapit lamang sa ila panimalay ang lugar kung sa diin ini nasapwan lakip na ang iya motorsiklo.
Nagapati naman ang bata sini nga nakainom ang iya amay kag posible nga nahulog sa kanal kag wala makapauli sa iya ginadayunan.
Sa subong gindala na sa punerary ang bangkay sang biktima kag nagapati man ang pamilya sini nga wala sang foul play nga natabo.
Nahibaluan nga yara sa iban nga pungsod ang asawa sang biktima kag nagatrabaho bilang OFW.
