KORONADAL CITY – Liwat nga nagpanagtag sang bulig ang local government unit sang Palimbang, Sultan Kudarat sa masobra 300 residente nga apektado sang landslide kag paghampak sang dalagkuan nga balud sa 5 ka barangay sa nasambit nga lugar.
Ini ang ginkumpirmar ni Norhan Apil, ang MDDRMO acting Officer sang Palimbang sa interbyu sang Bombo Radyo Koronadal.
Suno kay Apil, lakip sa mga apektado nga lugar amo ang Sitio Nalinan sang Barangay Libua, Kidayan sang Northern Palimbang, Malisbong, San Roque kag Poblacion sa nasambit nga banwa.
Pagahatagan naman sang livelihood assistance ang yara sa 39 nga mga mangingisda nga naguba ang motorized bangka bangud sa paghampak sang dalagko nga balud sa baybayon.
Sa karon, ginahibalo pa ang pondo nga kinahanglanon agud nga makay-o ang 2 ka taytay nga naguba.
Sa inisyal nga assessment sang mga ini, naglab-ot sa masobra P800K ang inisyal nga damyos nga ginbilin sang kalamidad.
Kaangot sini, nagpanawagan si Apil sa mga residente sa ila nga banwa nga maghalong kag mangin vigilante sa tanan nga oras.
