KORONADAL CITY – Naglab-ot sa P77 million ang ginpain sang regional government sang Autonomous Region in Muslim Mindanao (ARMM) para sa emergency response nga nagalab-ot sa masobra 85 libo ka mga evacuees walo ka adlaw na ang nakaligad humalin nga magluntad ang Marawi siege.
Suno kay ARMM Gov. Mujiv Hataman, ginasiguro sang regional government nga wala sang mapabay-an nga mga evacuees labi na ang ila mga basic needs.
Nahibaluan nga sa ginpaguwa nga datos sang ARMM Humanitarian Emergency Action Response Team (HEART) naglab-ot na sa 17,007pamilya ukon 85,460 indibidwal ang apekrado sang Marawi crisis bangud sa pag-atake sang Maute terror group.
Sa nasambit nga numero 67,870 indibidwal diri ang nagapabilin sa 38 evacuation centers sa Lanao del Sur kag Iligan City samtang 2,633 pamilya naman ukon 16,590 indibidwal ang yara sa ila nga mga kapamilya.
Kaangot sini, nagalaum naman si Hataman nga matapos na ang kalakasan agud nga makapangabuhi naman sang normal ang mga residente sa Marawi.
