Wala ginakonsiderar nga pigado ang mga Pinoy nga naga gastos sang P21.3 SA kada pagkaon,base sa talaksan sang gobyerno para basehan ang kapigadohon.
Sa briefing sang Development Budget Coordination Committee (DBCC) sa Senado,ginpamangkot ni Sen.Nancy Binay si National Economic and Development Authority (NEDA) Secretary Arsenio Balisacan kon ano ang threshold para sa kapigaduhon sa pagkaon.
Ginpahayag ni Balisacan nga sa accounting paras a inflation, ang threshold yara sa P64 kada adlaw para sa tatlo ka pagkaon, ukon kapin P21.3 kada pagkaon sa kada indibidwal sa diin nagtaas na ang kantidad halin 2021 nga yara lang sa P55 kada adlaw.//Para kay Sen. Grace Poe ‘outdated’ na ang nasambit nga talaksan.
Aminado ang tiglikom sang NEDA nga daan na ang numero bangud ginpreparar ini masobra isa ka dekada na ang nakaligad apang ginkalro sini nga indi ang NEDA ang nagpreparar.
Suno kay Balisacan, ang computation para sa basket ang halin sa mga ginrekomendar nga food items halin sa Department of Health kag Food and Nutrition Research Institute kag ginhatag lang sang NEDA ang numero.
Samtang ,suno naman kay Binay, wala nagakaigo ang numero sa kon ano ang kinahanglan para mabuhi ang mga tawo sang mas sobra sa minimum nga kinahanglanon.
Nagapati naman si Sen. Joel Villanueva nga dapat islan ang basehan kon ang isa ka persona ukon pamilya ang makabig nga “food poor”.
