KORONADAL CITY – Tuman ang kalipay sang P50,000 nga regional winner sa Mindanao sa Grand Draw sang Buena Mano Salvo 2024 sang Bombo Radyo kag Star Fm nga si Ginang Roditha Azucen Demon sang Purok 1, Barangay Dumadalig, Tantangan, South Cotabato matapos nga nabaton na sini ang premyo sa ginpatigayon nga awarding kaina sang aga..
Si Nanay Roditha isa ka balo nga may 7 ka kabataan matapos nganapatay ang bana sini sang tuig 2014 pa.
Suno kay Nanay Roditha igabakal sini sang sin agud makay-o ang nagatulo nila nga atop ang portion sang iya nga nabaton nga premyo samtang ang iban iga-alawans sa duha ka estudyante sini kag ang iban pa igabakal sang panginahanglanon sa sulod sang ila panimalay.
Nahibaluan nga wala sang stable nga trabaho si Nanay agud mabuhi ang iya pito ka kabataan.
Sang napatay ang bana sini, siya na lamang ang nagaisahon nga nagatinguna sa pagbuhi sa ila pamilya.
Nagapanguma ini, napanglabor kag kun anu na lamang nga trabaho agud makakaon sila nga pamilya.
Ang mswerte nga proof of purchase nga nabunutan nga gingamit ni Nanay Roditha amo ang Surf powder.
Samtang, nabaton naman sang mga Grand Draw area winners ang ila mga premyo:
- 1st prize winner: P15,000 – Manuel Cataluna, Brgy. Zone 1. kor City – POP: Silver Swan Soysauce
- 2nd prize winner: P10,000 – Grace Concepcion, Purok San Francisco, Brgy. New Pangasinan, Kor City – POP: Silver Swan sukang puti
- 3rd prize winner: P5,000 – Vilma Deocampo, New Pangasinan, Tantangan, SoCot – POP: Surf Powder
- Ginbaton naman sang Grand winner sang 1 million pesos sa Tacloban city ang iya premyo kag karon panibag-o nga myembro sang Millionaires club sang Bombo Radyo Philippines.
