KORONADAL CITY – Nagpain sang reward money ang local government unit sang Maguindanao sa sin-oman nga makahatag sang impormasyon batok sa anom ka mga preso nga nakapalagyo sa Maguindanao Provincial Jail kahapon.
Ini ang ginpahayag sa Bombo Radyo Koronadal ni PSSupt. Rolly Octavio, ang city police director sang Cotabato.
Suno kay PSSupt. Octavio, P50,000 kada ulo ukon kabug-osan nga P300,000 ang igahatag nga reward sang Maguindanao LGU agud mapadasig ang pagdakop sa mga preso nga ginkilala sanday Dantes Sandigan Kadatuan, Golly Mangandong, Sindatok Ampatua, Sadam Lucas, Ameludin Maliga kag Turac Sabal nga lunsay nagapangatubang sa kaso nga illegal drugs, murder kag illegal possession of firearms.
Magluwas diri, mas ginpahugot nga manhunt operation man ang ginapatigayon sang mga otoridad batok sa mga suspek kun sa diin ginpalapta na ang laragway sang mga ini.
Makaligad ang nagluntad nga jailbreak kahapon, ginmando man ni Cotabato City Mayor Cynthia Guiani-Sayadi ang pagronda agud indi na maliwat ang hitabo.
Samtang nagapapadayon na ang imbestigasyon sa nagluntad nga jailbreak.
