KORONADAL CITY- Nagdangat sa P300,000 ang balor sang padya nga ginpatung ni Polomolok Mayor Bernie Palencia sa ulo sang suspek/s nga responsable sa pagpangluthang-patay sa 2 ka CSU member sini sa bahin sang Purok 8, Barangay Sulit, Polomolok, South Cotabato.
Sa interview sang Bombo Radyo sa alkalde, preparado ini nga mag hatag sang nasambit nga balor sa mga makabulig sa pagtudlo sa mga wala pa makilal-an nga suspek nga nagpatay sa mga CSU members nga sanday Bonifacio Cabisada, 58, may asawa, kag isa ka retirado nga pulis nga si Jessie Arciete, alias “Loloy”, 56, may asawa, CSU member nga residente naman ng Purok Pag-asa, Barangay Silway 8, Polomolok, South Cotabato.
Dugang pa sang opisyal, malapit ang mga biktima sa iya bangud kulukasubong nga mga utod na ang kabig sini sa mga napatay nga biktima.
Naguwa sa imbestigasyon sang Polomolok PNP nga naga asoy ang duha ka biktima sa dalanon sakay nga ila nga mga motor kag padulong sa Polomolok sang hinali na lamang ang mga ini nga ginpagluthang sang wala pa mahibaluan nga mga suspek.
Nakaangkon sang mga igo sang bala halin sa wala pa mahibaluan nga sahi sang armasluthang ang mga biktima kabangdanan nga natumba ang mga ini sa kongreto nga dalanon.Gintilawan pa nga dalhon sang mga otoridad ang mga biktima sa balay-bululngan apang wala na ang mga ini nakaabot nga buhi.
Madasig naman nga nagpalagyo ang mga suspek sa wala pa nahibaluan nga direksyon makaligad ang krimen.
Blangko naman ang otoridad kag ang alkalde sa matoud nga motibo sang mga suspek sa pagpangluthang sa mga biktima.
