KORONADAL CITY – Mag-ikatatlo na nga State of the Nation Address (SONA) ni Pangulong Ferdinand Marcos Jr. wala sa gihapon matuman ang ginpromisa sini nga panubuan sa P20 per kilo ang bugas sa pungsod.
Ini ang reaksiyon ni Ginang Gina Pabalatin, isa ka residente sang Barangay New Pangasinan diri sa siyudad sang Koronadal sang ginkuhaan sang reaksiyon angot sa gina-ekspektar sini nga mabatian sa lunes nga adlaw.
Sa subong tuman ka mahal ang presyo sang bugas bangud nagalab-ot sa P50-P60 per kilo ang bugas nga indi gid masarangan sang mga pigado.
Ginahingyo man sini nga kuntani matutukan ang mga mangunguma bangud sa sunod-sunod nga kalamidad tuman nga nabudlayan ang mga ini nga halos wala na sang may mahimo nga paagi agud nga makatanum sang palay kag mais.
Dugang pa diri nga puro na makinarya na ang ginagamit sa pagtanum sang mga produkto sa talamnan gani nadulaan naman sang palangabuhian ang mga laborer nga nagasalig sa pagpananum kag pagharvest.
May yara man sang ginapabugal nga programa kag bulig sa mga mangunguma ang gobyerno apang pila lang ang makatilaw sang binhi, abono kag farm inputs.
Nagapati man si Ginang Pabalatin nga ginapili lamang ang ginahatagan sang bulig.
Sa karon, ginahingyo sini nga kabay pa nga matuod-tuod nga bulig para sa mga mangunguma ang ihatag sang pangulo.
![](https://img.bomboradyo.com/koronadal/2024/07/ordinary-people-on-PBBMs-SONA.jpg)