Gina-bulubanta yara sa masobra Php 2 milyon ang balor sang smuggled ciggarette ang nasabat sang mga otoridad sa isa ka COMELEC checkpoint sa National Highway, Brgy. Poblacion, Makilala, North Cotabato.
Ini ang ginkumpirmar ni PCMSgt. Ritchie Gesulga sang Makilala MPS sa interview sang Bombo Radyo Koronadal.
Madason nga gintigayon ang checkpoint operation ang kaupod ang pwersa sang Regional Intelligence Division-12, RMFB 12, mahalin nakadawat sila sang impormasyon nga may paabot nga may dala nga smuggled nga sigarilyo halin Digos, Davao del Sur pakadto sa North Cotabato.
Suno saiya, nabalabagan nila ang duha ka unit sang mini-van nga unod ang 42 nga box ukon 2,180 nga ream sang sigarilyo nga nagabalor sang Php2, 362, 800.
Ginkilala ang mga driver sang duha nga salakyan nga sila alyas “Mike” kag alyas “Adzal” nga pareho yara sa wasto nga pangedaron, napaslawan man ang mga ini nga magpakita sang mga dokumento sa pagbiyahe sang nasambit nga mga sigarilyo rason agod dakpon ang mga ini.
Maga-atubang sa kaso nga paglapas sa RA 10845 ukon “Anti-Smuggling Act” kag RA 12022 ukon “Anti-Agricultural Sabotage Act”, ang mga nadakpan nga mga suspek.
Nagapanawagan naman si Gesulga nga padayon ang ila pagdakop kag pagbantay sa mga nagapasulod sa iligal nga mga butang
