KORONADAL CITY – Naglab-ot sa P1.4M ang kantidad sang kwarta nga gin-uli sang mga Barangay Kapitan sa banwa sang Tboli, South Cotabato nga ginhatag sa ila bilang suno pa suhol para lamang botohon agud magdaug ang isa ka kandidato sa pagka-presidente sang Association of Barangay Captain (ABC) sa ginpatigayon nga eleksiyon kaina sang aga.
Ini ang ginbuyagyag ni Mayor Dibu Tuan sa interbyu sang Bombo Radyo Koronadal.
Suno kay Mayor Tuan, personal nga gin-uli sang mga Barangay Kapitan sa iya ang kwarta rason nga dismayado siya sa nasambit nga kandidato o sa sin-u-man nga grupo bangud sa manubo nga panan-aw kag pagpang-insulto sa ila nga tribo.
Dugang pa sang alkalde yara na sa P150,000 ang ginhatag sa 12 sa 25 ka mga Brgy Kapitan.
Sa subong yara sa iya ang masobra 850 mil pesos kag ginalauman nga may 2 pa ka Kapitan nga magahatag sang kwarta nga ila nabaton sa subong nga adlaw agud makumpleto ang P1.4M pesos.
Samtang, pursigido nga magpasaka sang kaso kag disqualification si Mayor Tuan sa mga Barangay Kapitan nga yara sa likod sang bribe money.
Suno kay Mayor Tuan, pagausaron niya ang ginbalik nga kwarta kag ang testimonya sang mga leader bilang ebedensiya.
Sa pagkamatuod, nakig-angot na siya sa DILG-South Cotabato agud nga maaksiyunan ini.
