KORONADAL CITY- Ginakabig nga chismis lang ni Deputy Speaker for Mindanao kag South Cotabato 2nd District Rep. Ferdinand Hernandez ang nagwa nga impormasyon nga may nagluntad nga tawganay sa mga mamalidha kag si Presidential Daughter kag Davao City Mayor Sara Duterte-Carpio ang yara sa likod sang pagkakas kay Pantaleon Alvarez bilang pinuno sang Kamara de Representantes.
Sa ekslusibo nga interbyu sang Bombo Radyo Koronadal kay Deputy Speaker Hernandez, ginarespeto nila ang nangin desisyon sang super-majority bangud nagapati ini nga para ini sa ikaayo sang tanan kag pagsabat sang kamara sa agenda ni Pres. Rodrigo Duterte agud madul-ong ang mga serbisyo sa mga pumuluyo.
Ini gid lamang ang realidad kag nagabag-o gid ang political environment apang tawo lang si Congressman Alvarez kag normal nga masakitan sa mga panghitabo apang nagapati ini nga bilang isa ka beterano nga mamalidha malampuwasan sini ang pagtilaw sa iya nga political career.
Nagapati naman ang mamalidha nga mahimo sang maayo sang bag-o nga House Speaker nga si anay presidente kag Pampanga Rep. Gloria Macapagal-Arroyo ang iya nga responsibilidad.
